لائحة بابا أويحية

لائحة القرارات الإدارية بالشركة
طبقا لقانون العمل البزرميطي لدولة بابا أوبح الفدرالية
لعام 2016 بعد الثورة

قرار 1 :
قائمة الممنوعات :
- يمنع منعا باتا التأخير عن موعد العمل الرسمي, وكل دقيقة تأخير تحتسب بمرتب شهرين مقدما, كما توجد عروض بالتقسيط
- لا يسمح أبدا بتواجد أي من العاملين بطرقات القناة المقدسة, وكل من يتم لمحه بيلف كده ولا كده هيضرب عيارين في راسه على سبيل الإنذار
- ممنوع تناول الطعام أو دخول الحمام او الصلاة أو الكلام أو الضحك أو الرمش بالعين أو العطس في غير مواعيد الراحة الرسمية, كما يمنع التنفس المتواصل في غير مواعيد البريك, فيما عدا لو عندك ربو ... وإلا هنجيبلك "بريك" في المرتب
- لا يحق لك بأي شكل من الأشكال التجرأ على المطالبة بتعديل راتبك لأنه طبقا للشركة "رجس من عمل الشيطان" وبالنسبة للقانون "سب وقذف يعاقب عليه المتهم"
- رجاءاً, لا تستخدم الكمبيوتر إلا في حالات إنقطاع الكهرباء
- لا تحاول أن تسأل عن أسباب الخصم, لأن هذا سيؤدي بك إلى خصم آخر
- لا تسأل عن سيارة تقلك إلى العمل, احمد ربنا إنك بتاخد مرتبك أساساً
- لا يسمح بتقديم طلبات الأجازة إلا في حالات الوفاة, بشرط أن يكون الميت أنت شخصيا
- لا يقبل أي إذن بعد موعده بيوم, او في نفس اليوم, أو قبلها بيوم ... في الواقع, احنا مبنقبلش أذونات اساسا

قرار 2:
كل من تسول له نفسه محاولة مراجعة الشركة في قراراتها, أو ينوي ذلك, أو يجلس بجانب أحد ينوي أن يزور أحدا يرغب أن يكلم شخصا في أن يكلم الإدارة في ذلك, يعرض نفسه للشنق ثلاث مرات ثم إنذار في حالة التكرار "عشان كله يمشي بورقه"

قرار 3:
حرصا منا على مصلحة أبو حفيظة, نرجو من جميع السادة الموظفين زيادة ساعات العمل من أنفسهم إلى الضعف , وأهو كله بأجره, وهنيالك يا فاعل الخير والثواب.

قرار 4:
كل من لا ينفذ قرار 3, برجاء كتابة استقالته وتقديمها فورا للمدير العام ... والباب يفوت ستين جمل ... واخد بالك يا إسلام ؟

قرار 5:
اشتغل بضمير, وخلي بالك إن ربنا شايفك ... ووقت المرتب مش هنعرفك, واحتسب أجرك على الله.

قرار 6:
لا يحق لأحد أن يطالب بأجازة مصيف أو امتحانات أو وضع أو خلع أو موت, إلا في حالة مرور 20 سنة على تعيينه في الشركة ... علما بأن الشركة مكملتش خمس سنين على بعض

قرار 7:
ممنوع تناول الأطعمة, أو المشروبات, دون أن تمر على عيون كل العاملين في الشركة ... وكل مغص كلوي وانت طيب

قرار 8:
الشركة تحبك, وممكن تحلفلك على المصحف ... بس غاوية تخنقك, من قبيل حبيبك يبلعلك الزلط, ولو إنه مبقاش زلط بس ده بقى هضبة المقطم بحالها

قرار 9:
الحمامات مناطق ذات إشعاع نووي خطير, برجاء اصطحب كماماتك معك ... الشركة غير مسئولة عن أي وفاة ناجمة عن "شمة ريحة"

قرار 10:
يجب أن تلتزم بالحضور في المواعيد الرسمية غصب عنك .... حتى لو الشركة في أكتوبر وانت من بنها ... سامع يا ناجي ؟

قرار 11:
قائمة حقوق الشركة :
- اشتغل بضمير
- اشتغل بضمير – جزء تاني
- لا ترفع عينيك عن الشاشة ولا أصابعك عن الكيبورد, ولا تتثائب أو تعطس أو تحاول أن تتنحنح ... ده وقت الشركة واحنا مش مسامحينك
- مفيش إنتاج وانت راجل فاشل
- على فكرة ... انت فاشل
- نسيت أقولك ... يا فاشل يا فاشل
- شد حيلك ... عايزين نبقى شركة منافسة, زي شركة "اللي مش حافظ"
- لو اشتغلت من هنا للصبح وطلعتلنا إنتاج ... برضه الناس اللي بره أحسن منك

قرار 12:
قائمة حقوق الموظف :
-احتمال .... تقبض مرتبك ... احمد ربنا وخليها مستورة

قرار 13: كل القرارات السابقة هي في مصلحتك أولا وأخيرا ... واحنا يهمنا راحة سعادتك ... حاول بس ... لو تقدر يعني ... تشتغل معانا لوجه الله "فور فري" ... داحنا غلابة

الإدارة المركزية لمركز شباب البلاليط